Өчигдөр (2020 оны 09-р сарын 30) Шүдний эмнэлгүүдийн удирдлагын группын анхны зөвлөлдөх уулзалт Корпорейт зочид буудалд боллоо. Энэ удаагийн зөвлөлдөх уулзалтанд нийт 100 орчим эмнэлгийн удирдлага, захирлууд хүрэлцэн ирж оролцож дотоод асуудлаа хэлэлцлээ.
Хурлаар шүдний эмнэлгүүдийн хувьд тулгамдаад байгаа хүний нөөцийн, хууль тогтоомжийн болон бусад асуудлуудыг хэлэлцсэн бөгөөд асуудлуудыг хэрхэн шийдвэрлэх чиглэлээр эмнэлгийн удирдлага бүр өөрсдийн санал шийдлийг дэвшүүлсэн ажил хэрэгч уур амьсгал дор 18:00-оос шөнийн 12 цаг хүртэл 6 цаг үргэлжиллээ.
Эмнэлгийн удирдлага болгоны дэвшүүлж буй асуудал, асуудлын гарц шийдлийг протоколд тэмдэглэн үлдээсэн бөгөөд цаашид ажлын хэсэг томилж асуудлуудыг эрэмбэ дарааллын дагуу хэрхэн шийдвэрлэх арга замыг тохиролцсоноор хурал өндөрлөлөө.
Зөвлөлдөх уулзалтын үйл ажиллагааны хүрээнд нийгэмд хувь хүний нөлөөллийн чиглэлээр өргөн хүрээний ажил зохион байгуулж буй “Лантуун дохио” ТББ-н тэргүүн Ч.Ганжавхлан хүрэлцэн ирж хүүхэд хамгаалал, хүчирхийллийн эсрэг хийж буй төслөө танилцуулж олон хүний урам зоргийг сэргээсэн сайхан илтгэл тавьлаа.
Цаашдаа Шүдний эмнэлгийн удирдлагуудын групп хүүхэд хамгааллын “Ид шидийн орон” төсөлтэй хамтран ажиллаж Улаанбаатар хотод үйл ажиллагаа явуулж эмнэлэг бүр эмзэг бүлгийн 1-2 хүүхдийг урт хугацаанд дааж авч эмчилж амны хөндийг нь бүрэн эрүүлжүүлж туслах чиглэлээр санаачилга гаргаж 100% дэмжлээ.
Уулзалтын үйл ажиллагаанд Монголын Анагаах ухааны эрхзүйн холбооны Ерөнхийлөгч АУ доктор Г.Ганбат өмгөөлөгч оролцож Эрүүл мэндийн салбарын хууль тогтоомжийн өнөөгийн байдал болон эмч нарын дэвшүүлж буй асуудлуудыг хэрхэн хуулийн дагуу зөв шийдвэрлэх чиглэлээр зөвлөгөө өгч, эмч нарын асуултанд хариуллаа.
Энэхүү зөвлөлдөх уулзалтаар шүдний эмнэлгүүдийн удирдлагууд тодорхой хүрээний асуудлуудыг шийдвэрлэсэн бөгөөд уг асуудлуудын чиглэлээр тусгайлан мэдээлэл бэлтгэхээр ажиллаж байна.
Зөвлөлдөх уулзалтын үеэр АШУҮИС-н НАСС-н профессор Н.Пүрэвжав багшийн болон АУ доктор Н.Цэнгэлсайхан багш нарын "Нүүр амны согог засал", "Эрднийн шаштиртай нутгийн энгүй домогт өвөг дээдсийн үр сад билээ би", "Миний нүүр" номуудын таницуулга, гарын үсэгтэй худалдаа зохион байгуулагдлаа.
