Энэ удаагийн дугаараар бид “Глобал шүдний эмнэл”-гийн гүйцэтгэх захирал Д. Баярчимэг эмчийг урилаа. Тэрээр 2007 онд ЭМШУҮИС-ийг Нүүр амны их эмч мэргэжлээр төгссөн. 2013 онд БНСУ-ын Сөүлийн Их Сургуулийн Шүдний Тулгуур Эдийн Магистрийн зэрэг хамгаалсан. АНУ-ийн Zimmer Biomet Имплантын Монгол дахь төлөөлөгч эмч. Монголын Шүдний Тулгуур Эдийн Холбооны Дэд Тэргүүн юм.
Өөрийн мэргэшсэн чиглэлийн талаар танилцуулаач?
2007 онд ЭМШУИС-ийг Нүүр Амны Их Эмч мэргэжилээрээ төгссөн. 2007 оноос 2009 оны хооронд Туждент шүдний эмнэлэгт эмчлэгч эмчээр 2 жил ажилласан юм. Тэр хугацаанд өөрийгөө илүү танин мэдэж, тулгуур эд талдаа илүү сонирхолтой гэдгийг мэдсэн.
2009-2013 оны хооронд Сөүлийн их сургуульд шүдний тулгуур эдийн чиглэлээр магистрийн зэрэг хамгаалсан. 2014 оноос Глобал Шүдний эмнэлгийг байгуулж Гүйцэтгэх захирлаар нь ажиллаад 5 жил болж байна. Мөн Монголын Тулгуур эдийн холбооны Дэд тэргүүнээр ажиллаж байна.
Өөрийн хамгийн их ашиглах дуртай багаж хэрэгсэлийг танилцуулаач?
Scaling-ийн хошуу, гар багажнуудад хамгийн дуртай. Би үйлчилгээ үзүүлж, эмчилгээ хийж байгаа бүх хүнд эхлээд заавал scaling буюу цэвэрлэгээ хийж өнгөрийг арилгадаг. Энэ нь эргээд манай эмнэлгийн онцлог болсон бөгөөд цэвэрхэн амны хөндий, шүдэн дээр ломбо тавихад урамтай санагддаг.
Танай эмнэлгийн баримталдаг зарчим, үнэт зүйл нь юу вэ?
“Чанартай эмчилгээ үйлчилгээг, олон улсын стандартын дагуу үйлчлүүлэгч нартаа хүргэх” гэсэн зарчмыг манай эмнэлэг гол зорилгоо болгон мэрийж ажилладаг.
Хамт олон, эмнэлгийг маань зорин ирдэг үйлчлүүлэгчид манай эмнэлгийн үнэт зүйл нь. Амжилттай, бүтээмжтэй явж байгаа байгууллагын ард үргэлж хамт олон нь байдаг. Үйлчлүүлэгч орж ирэхэд угтан авч буй ресепшин, үйлчлэгч, сувилагч, эмч зэрэг маш олон хүний цогц үйл ажиллагаа бүрэлдэж байж, тухайн эмнэлэг сайн үйлчилгээ үзүүлж, үйлчлүүлэгч маань дүнгээ тавьдаг. Ингэсэнээр тогтвортой үйл ажиллагаа тогтвортой явагдан гэж боддог.
Танай эмнэлгийн сүүлийн үед хэрэглэж буй багаж технологиуд?
Vatech Pax-i3D smart CT аппаратыг голчлон ашигладаг. Энэ төхөөрөмж дээр оношлогоо хийж, эмчилгээний явцыг маш сайн хянаж чаддаг. Ер нь хэрэглэж буй материал, нэг удаагийн хэрэгсэл, тоног төхөөрөмжүүдээс хамгийн чанартай сайныг нь хэрэглэхийг зорьдог.
Эмнэлгийн хөрөнгө оруулалтыг хэрхэн шийдэж байсан бэ?
Солонгост сурахдаа их зүйл сурч ойлгосон. Магистр хамгаалаад дипломоо бариад, эрч хүчээр дүүрэн Монголдоо ирж байсан. Тэр үед эмнэлэг нээх сэдэл төрөөд хөрөнгө оруулагч хайгаад явж байх үед ах маань тусалж хөрөнгө оруулахаар болсон. Тэгээд тэр хөрөнгө оруулалт, мөнгийг тухайн үед зөв зарцуулсан мэт санагддаг. Эмнэлэг амжилттай явах уу үгүй юу гэдэг нь орж ирсэн мөнгийг юунд зарцуулах, юунд хөрөнгө оуулалт хийх вэ гэдгээс их хамаардаг юм шиг байгаан.
Олон нийтэд зориулж ямар ажлууд зохион байгуулдаг вэ?
Манай эмнэлэг нийгмийн эрүүл мэндийн боловсролыг нэмэгдүүлэх зорилгоор нилээдгүй ажил зохион байгуулдаг. Энгийн, анхан шатны эрүүл мэндийн ойлголтоос эхлээд шүдний гоо сайхны мэдлэг олгох зорилготой контентүүд бэлтгэж нийгмийн сүлжээгээр түгээдэг. Шүдээ хэрхэн угаах вэ? шүдний цоорол гэж юу вэ? Шүдгүйдлийг яаж шийдэх вэ? гэх мэт контентүүд бэлтгэдэг.
Үүнээс гадна залуучууд ихээр ажилладаг томоохон аж ахуй нэгжүүдтэй бодлогоор хамтран ажиллаж тэдний гэр бүл, ойр тойрны хүмүүст тэднээр дамжуулж эрүүл мэндийн боловсрол олгох зорилгоор тогтсон ажлуудыг зохион байгуулдаг. Мөн бидний мэдээллийг авч чадахгүй байгаа “Өнөр бүл” асрамжийн газар болон зарим хүүхэд хамгааллын байгууллагуудтай хамтран ажилладаг. Манай эмнэлэг дээр жил тутам хяналтад ороод явдаг эдгээр байгууллагын харьяа өсвөр насны 20 гаруй хүүхдүүд байдаг.
Таны ажлын өдрүүд хэрхэн өнгөрдөг вэ?
Манай эмнэлэг 7 хоног бүрийн даваа гарагт 5-9 цаг хүртэл хурал хийдэг. Хурал дээр өнгөрсөн долоо хоногт ирсэн үйлчлүүлэгчид, гарсан алдаа дутагдал, түүнийг хэрхэн засах болоод одоо болох долоо хоногыг хэрхэн эрч хүчтэйгээр үргэлжлүүлэх талаар ярилцдаг. Мягмар гариг болгонд янз бүрийн семинар зохиогддог. Лхагва гараг бүр заал авж эрүүл мэнддээ анхаардаг. Мөн өглөө болгон эмч нарын хурал болдог. Тухайн өдөр хийгдэх эмчилгээний төлөвлөгөө харна, ийм үйлчлүүлэгч ирсэн энэ дээр ямар эмчилгээ хийвэл үр дүнтэй, хэрхэн амны хөндийг эрүүлжүүлэх талаар санал солилцоно. Энэ болгон дээр хяналт тавьж, чиглэл өгч ажилладаг. Ихэвчлэн өглөөнөөс оройг хүртэл эмнэлэг дээр өнгөрөөдөг. Их л завгүй байдаг даа.
Шүдний эмч гэдэг байнга цагт баригдаж яарч байдаг. Таныхаар цаг хэмнэх хамгийн сайн арга тань юу вэ?
Ашиггүй цаг л өнгөөрхгүй байх хэрэгтэй. Үүний тулд мэдээж төлөвлөнө. Би жил, сараар нь төлөвлөгөө гаргадаг. Мартахгүйн тулд үргэлж бичиж тэмдэглэдэг. Тэгээд хийсэн зүйлээ хасаад, дараагийн хийх зүйлсээ нэмээд явдаг.
Шүдний эмч бидэнд утсаар ярих цаг гардаггүй. Тийм болохоор машинд түгжрээд явж байхдаа цаг хэмнээд хүмүүстэй ярих ажлуудаа амжуулна. Үзлэг дундуур жоохон цаг гарвал төлөвлөгөөгөө харж дутуу хийсэн зүйлсээ гүйцээдэг.
Шүдний эмчээр ажиллахын эерэг болон бэрхшээлтэй талууд?
Эерэг тал нь хийсэн эмчилгээний үр дүн тэр дороо гардаг. Бусад салбарыг бодвол бидний хийж байгаа эмчилгээ нүдэнд ил байдаг болохоор хүмүүс сэтгэл ханамж нь ямар байгааг шууд илэрхийлдэг. Тэр сэтгэл ханамж, талархлыг хүлээн авах нь өөрөө бас их гоё мэдрэмж. Мөн мэргэжилдээ дуртай болохоор олон эерэг сайхан талуудыг нь мэдэрдэг.
Бэрхшээлтэй тал нь цагт баригдана. Мөн нэг өрөөнд ороод өглөөнөөс орой болтол хүнд эмчилгээ, үйлчилгээ үзүүлж байгаад гараад ирнэ. Гадагшаа хүмүүстэй харилцах нь дутмаг болж байгаа мэт санагддаг.
Та хэр их уншдаг вэ? /Сүүлийн үед уншсан судалгааны өгүүлэл, ном/
Уншихад цаг гаргадаг. Google scholar, Pubmed зэргээс судалгааны өгүүлэл хайж уншдаг. Мэдэхгүй зүйлсээ олж авдаг. Хамгийн сүүлд “Үи Хуа – Амьдрахуй” номыг уншиж байна.
Хамгийн сүүлд хамрагдсан сургалт…?
Сая 9 сард “Ази, Номхон далайн бүс нутгийн шүдний тулгуур эдийн” 14-р хурал болсон. Тэр хуралд Монголыг төлөөлж оролцсон. Шанхайд болсон Zimmer Biomet ийн ахисан шатны сургалтанд Монгол эмч нартайгаа хамт оролцоод ирсэн. Мөн 10 сард Солонгост болсон Osstem-ийн сургалтад хамрагдсан. Жижиг, том гэлтгүй янз бүрийн сургалтад хамрагдаж байдаг.
Чөлөөт цагаа хэрхэн өнгөрөөдөг вэ? /Стрессээ хэрхэн тайлж, юунаас урам зориг авдаг вэ?/
Гэр бүлийнхэнтэйгээ цагийг өнгөрөөх нь стресс тайлдаг. Болж бүтэхгүй зүйл байвал нөхөртэйгээ ярилцаж шийдлийг хайдаг. Хаяа бас найз нөхөдтэйгээ уулзаж ярилцаж суух дуртай. Дээр нь би их нээлттэй хүн учраас өөртөө стресс хураадаггүй. Тухайн үед нь бодсон зүйлээ хадгалаад байлгүй шууд хэлчихдэг.
Өмнө хэлсэнчлэн манай эмнэлэг даваа гараг болгон хурал хийдэг тэр үеэр эмч, сувилагчид бүгд бодсон, санасан бүх зүйлээ ууталж ярилцдаг тэр нь эргээд стрессээ гаргах, бодсон санаснаа ярих боломжийг олгож байгаа мэт санагддаг.
Хүн амын дундах шүдний өвчлөл өндөр байгаад ямар байр суурьтай байдаг вэ?
Хоёр л зүйл байгаа юм. Ард иргэдийн эрүүл мэндийн боловсрол тааруу, мэдлэг мэдээлэл дутмаг, Нөгөө нь ерөөсөө л бидний хэнэггүй зан. Яаж урьдчилан сэргийлэхийг мэдэхгүй, хүндэрвэл ямар арга хэмжээ авахыг мэдэхгүй, эрүүл байхын ашиг тусыг ойлгохгүй тэгээд үргэлж өвдсөн хойно нь ирдэг. Ингээд харахаар хүмүүсийн эрүүл мэндийн мэдлэг боловсролыг л сайжруулмаар байгаа юм. Наад зах нь 6 сар тутмын хяналтадаа ирээд үзүүлдэг болчихсон байхад ямар шүд цооролтой, өвдөх гэж байна гэдгийг нь урьдчилаад мэдчихнэ шүү дээ.
Шүдний эмч болж буй залуу мэргэжилтнүүдэд хандаж өгөх зөвлөгөө?
Нэгдүгээрт нь сайн сурч боловсрох хэрэгтэй. Энэ нь сайн эмч сайн мэргэжилтэн болоход нөлөөтэй. Дараа нь сургуулиа төгсөөд мэргэжилээрээ хоёр жил ажиллавал зүгээр. Тэгснээр мэргэжилийнхээ гүнд ороод би юу хийж чадах юм, юунд илүү дуртай, сонирхолтой байна гэх зэргийг мэднэ, ойлгоно. Энэ нь эргээд нарийн мэргэжилээ сонгоход дөхөм болдог. Мөн миний бодлоор сурч боловсорсны эцэст монголдоо ирж, шинэ зүйлс нэвтрүүлж ажиллавал зүгээр санагддаг. Энд болохгүй байна гэхээс илүүтэй энийг яаж хөгжүүлэх вэ гэх нь илүү зөв болов уу.
Дараагийн ярилцлагад манай буланд хэнийг санал болгох вэ?
Залуу үедээ үлгэр дуурайлал болохоор манлайлаад, эмнэлэгээ сайн удирдаад явж байгаа “Сүүн Шүдхэн” эмнэлэгийн гүйцэтгэх захирал Дөлгөөн эмчийн ажлын арга барилтай танилцмаар байна.
